John 5

Ukusilisa Echibini

1Sekungesinye isikhathi esilandelayo uJesu waya eJerusalema edilini labaJuda.

2EJerusalema kukhona ichibi eduze lesango leZimvu, elithiwa ngesi-Aramu yiBhethisida, elalihonqolozelwe ngezinsika ezinhlanu ezibiyelweyo. 3Khonapho abantu abayizilima abanengi babandise ukulala – iziphofu, abaqhugezelayo, abome umhlubulo – belindele ukuqubuka kwamanzi; ( 4ngokuba kwakusithi ngezikhathi ezithile ingilosi yeNkosi yayisehlela echibini, amanzi adungadungwe, besekusithi umuntu oqalayo ukungena emanzini ngemuva kokudungeka kwawo asiliswe loba kukuwuphi umkhuhlane owawumbambile.) 5Omunye owayelapho wayesebe yisigoga okweminyaka engamatshumi amathathu lesificamibili. 6Kwathi uJesu embona elele khonapho njalo esetsheliwe ukuthi kade abanjalo okwesikhathi eside, wambuza wathi, “Uyafuna na ukuba usile?”

7Oyisilima waphendula wathi, “Mnumzana, kangilamuntu wokungisiza angingenise echibini lapho amanzi edungwa. Ngithi lapho ngizama ukungena omunye angingenele kuqala.”

8UJesu wasethi kuye, “Sukuma! Thatha icansi lakho uhambe.” 9Khonokho nje indoda yasila; yathatha icansi layo yahamba. Lokhu kwenzakala ngelanga leSabatha,

10yikho abaJuda base besithi endodeni eyayisilisiwe, “KuliSabatha; umthetho uyakwalela ukuthi uthwale icansi lakho.”

11Kodwa yaphendula yathi, “Umuntu ongiphilisileyo uthe, ‘Thatha icansi lakho uhambe.’ ”

12Base beyibuza bathi, “Ngubani yena lowo okutshele ukuthi uthathe icansi uhambe?”

13Indoda leyo eyasiliswayo yayingafanisi lakufanisa ukuthi kambe ngabe wayengubani, ngoba uJesu wayesethe nyelele wangena phakathi kwabantu.

14Muva kwalokho uJesu wayifumana ethempelini indoda leyo wathi kuyo, “Khangela-ke usuphila njalo. Khawula ukwenza isono funa okubi okudlulayo kungakwehlela.” 15Indoda leyo yasuka yayatshela abaJuda ukuthi kwakunguJesu owayeyisilisile.

Ukuphila NgeNdodana

16Yikho abaJuda bamkhahlameza uJesu ngokuba wayesenza izinto lezi ngeSabatha.

17UJesu wathi kubo, “UBaba uhlezi esemsebenzini wakhe kuze kube namuhla, yikho lami ngiyasebenza.” 18Ngalesi isizatho abaJuda bazama kakhulu ukumbulala; wayengephuli iSabatha kuphela kodwa wayebiza uNkulunkulu ngokuthi nguYise, ezenza yena olingana loNkulunkulu. 19UJesu wabanika impendulo le: “Ngiqinisile ngithi iNdodana ingeke yenze lutho, ngokwayo; ingenza kuphela lokho ebona uYise ekwenza, ngokuba loba kuyini uYise akwenzayo leNdodana iyakwenza. 20Ngokuba uYise uyayithanda iNdodana, uyitshengisa konke akwenzayo. Yebo, lizamangala ukuthi uzayitshengisa izinto ezinkulu kulalezi.

21Njengalokhu uYise evusa abafileyo abaphe ukuphila, kanjalo iNdodana inika ukuphila kulabo ethanda ukubanika khona. 22Okunye njalo, uYise kahluleli muntu, kodwa usebeke konke ukwahlulela ezandleni zeNdodana, 23ukuze bonke bayidumise iNdodana njengalokhu bedumisa uYise. Lowo ongayidumisiyo iNdodana kamdumisi uYise oyithumileyo.

24“Ngiqinisile ngithi lowo owezwayo amazwi ami amkholwe lowo ongithumileyo ulokuphila okungapheliyo njalo kazukulahlwa; usechaphile wasuka ekufeni waya ekuphileni. 25Ngiqinisile ngithi, isikhathi siyeza njalo sivele sesifikile lapho abafileyo bezalizwa ilizwi leNdodana kaNkulunkulu, kuthi bonke abezwayo baphile. 26Njengoba uYise elokuphila kuye yena ngokwakhe, yikho useyinikile iNdodana ukuba ibe lokuphila kuyo yona ngokwayo. 27Njalo useyiphile amandla okwahlulela ngokuba iyiNdodana yoMuntu.

28“Kakungalimangalisi lokhu ngokuba siyeza isikhathi lapho kuzakuthi bonke abasemathuneni abo bezalizwa ilizwi layo 29baphume – labo abenze okuhle bazavuka baphile, lalabo abenze ububi bazavuka balahlwe. 30Mina ngokwami ngingeke ngenze lutho; ngahlulela njengokutshelwa kwami, futhi ukwahlulela kwami kuqondile, ngokuba kangidingi kuzithabisa kodwa ukuthabisa lowo ongithumileyo.

Ubufakazi NgoJesu

31“Uma ngizifakazela mina ngokwami ubufakazi bami kabuqinisekanga. 32Ukhona omunye ofakaza kuhle ngami, njalo ngiyazi ukuthi ubufakazi bakhe ngami buqinisekile.

33“Selike lathumela kuJohane yena walifakazela iqiniso. 34Kakutsho ukuthi ngamukela ubufakazi bomuntu; kodwa ngikuthinta lokhu ukuze lisindiswe. 35UJohane wayeyisibane esabhebhayo sanika ukukhanya, lakhetha ukuthokoza ngokukhanya kwakhe okwesikhatshana.

36“Ngilabo ubufakazi obulesisindo esikhulu kulobukaJohane. Ngokuba umsebenzi uBaba anginike wona ukuba ngiwuqedise, wona engiwenzayo, uyafakaza ukuthi uBaba ungithumile. 37Njalo uBaba ongithumileyo usefakazile yena ngokwakhe ngami. Kalikaze lilizwe ilizwi lakhe kumbe labona isimo sakhe,

38njalo ilizwi lakhe kalihlali kini, ngoba kalimkholwa lowo amthumileyo. 39Liphenyisisa iMibhalo liyihlola ngokuba licabanga ukuthi ngayo lilakho ukuphila okungapheliyo. Yiyo le iMibhalo efakaza ngami, 40ikanti liyala ukuza kimi lizozuza ukuphila.

41“Kangilwamukeli udumo olusuka ebantwini,

42kodwa ngiyalazi lina. Ngiyazi ukuthi kalilalo uthando lukaNkulunkulu ezinhliziyweni zenu.

43Ngizile ngebizo likaBaba, kodwa kalingamukeli; kodwa nxa omunye efika ngebizo lakhe, lizamamukela. 44Lingakholwa kanjani uma lisamukela udumo eliphana lona, kodwa lingenzi mizamo yokuzuza udumo oluvela kuNkulunkulu onguye yedwa na?

45“Kodwa lingacabangi ukuthi ngizalethesa icala phambi kukaBaba. Ummangaleli wenu nguMosi, okukuye elibeke khona amathemba enu.

46Aluba lamkholwa uMosi, ngabe liyangikholwa, ngoba wabhala ngami. 47Kodwa njengoba lingakukholwa lokho akubhalayo, lizakukholwa kanjani lokho engikutshoyo na?”